傅穎羅仲謙分手事件

傅穎羅仲謙分手事件

轉貼蘋果日報

驚爆腳踏 13船  羅仲謙秘媾 HotCha女
2011年08月25日

傅穎（ Theresa）上周爆羅仲謙大鑊，指他一腳踏四船之餘，上月更被他打傷。昨日兩人在同一地點前後腳開謝罪記者會，女方驚冇得撈向公司「耍冧」，男方就形象破產死狗道歉。據悉羅仲謙在過去 4年來，挾 42吋霸氣巨胸狂媾 13女，最新登場的是女子組合 HotCha成員張紋嘉（ Crystal），有指兩人至今已暗交 3年，早前更在無綫電視劇《圓團》中奉旨調情，公然激咀肉搏。

傅穎不忿被舊愛羅仲謙劈腿兼動粗，上周突然私自爆料數臭巨胸謙，結果落得被經理人公司星皓雪藏、聽候賠錢解約的收場。雖然傅穎在處理感情事上欠理智，但她說的話確有根據，本周日（ 28日）滿 28歲的羅仲謙，媾女戰績十隻手指數唔晒。
昨日本報接獲報料，大爆羅仲謙暗媾 26歲 HotCha成員張紋嘉，地下情持續至今已 3年。原來早於 08年 1月，兩人合作拍無綫劇集《尖子攻略》時撻着，去年 1月謙仔搭上傅穎後，同期接拍《團圓》，當時他向劇組建議找 Crystal扮他女友被接納，兩人假戲真做，拍咀戲加料超激，還不時玩 iPhone甜蜜吹水。
過去 4年來影視兩邊走的巨胸謙，與他先後扯上關係的，除了北京正印女友、傅穎和 Crystal外，還有楊梓瑤（ Carol）、周秀娜、梁靖琪、黃智雯、江若琳、張慧雯、蔣家旻、落選港姐甄敏婷、蔡慧欣及張莉莎，巨胸謙要應付 13烈女周身唔得閒，難怪傅穎會知他手機有蠱惑，因而鬧出搶手機的被打風波。
Crystal昨否認和巨胸謙拍拖，她在電話中說：「我連佢電話都冇，點會係佢女朋友？ HotCha喺《尖子》做啦啦隊好少戲，《團圓》同佢拍攝見面都係兩、三次。」羅仲謙曾否追她？她笑說：「冇，我唔鍾意咁大隻嘅男仔，同埋我諗佢身邊會有好多靚女仔，睇我唔上眼啦。」

掟瘀籮拍照留念
昨更有消息指傅穎被巨胸謙打已非首次，去年她仍居於藍灣半島時，一次兩人同枱食粥突然吵大鑊，女方將一羮粥潑向男方心口，巨胸謙即向她兜巴星及推她落地。其後二人分手又復合，至上月傅穎發現巨胸謙與正印女友通電話，她㷫到失控狂揼男友巨胸被推落地，她爬起身，巨胸謙將她雙手屈後再推落地，繼而抱她入睡房掟落床，並撞到窗台，令她周身傷，巨胸謙則被她刮傷臉，遂以粗口怒吼：「我一拳就可以打 X死你！」翌日友人探訪傅穎時，發現她被打，傅穎竟讓朋友掀起短褲展示屁股瘀痕，兼且拍照留念。
巨胸謙公開道歉
傅穎和巨胸謙昨日各自於九龍灣開記者會認衰，傅穎先由胞姊陪同下出現，憔悴的她甫坐下即說：「我同羅仲謙之間嘅事，之前要講已經講晒，我同公司老闆（王海峰）、同事、屋企人、朋友，交代晒成件事，呢件事令到好多痛錫我嘅人好難過。」此時她一度哽咽，但隨即又說：「媽咪睇到我傷勢好傷心，我覺得好心痛，好對佢哋唔住。呢件事之前，我一直冇同公司、同事、屋企人講過我哋一齊番，分手嗰日發生咁大件事，佢哋都唔知道，我當時冇開口係因為我驚佢哋擔心，好驚影響屋企人，我同佢之間嘅感情對於我嚟講，係一件好難令人釋懷嘅傷心事，一個好沉重包袱，我好想我去北京之前擺低呢個包袱，抹走呢個陰影。」
傅穎強調她所作一切，事前皆沒知會公司，抱歉為公司添麻煩，並承諾不再發生同類事件，其舉動顯然是驚被解約，急急道歉補鑊。緊接開記招的羅仲謙，全程以一副哭喪樣說：「作為藝人，唔應該因為私人感情影響到各方面，所以我要向無辜被牽連嘅人道歉。」是否包括傅穎？他說：「我同 Theresa一齊時候有開心亦有嗌交，我唔想拎細節講邊個對同錯，我令 Theresa身體受傷害都係唔啱，我喺度向 Theresa道歉，但我否認有痛毆佢同一腳踏四船。」


傅穎




羅仲謙




大家睇吓佢哋個八字點解今年咁大鑊

有無紫微斗數?